Laugaskokk

Tvennt í stöðunni á morgun:

1) Rútuhlaupið - Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.

2) 15-25 km túr frá World Class Ögurhvarfi. Leggjum í hann kl. 9, hringurinn kringum Elliðavatnið er um 9 km og við bætum við km á stígunum í Heiðmörkinni eftir þörfum og vilja hvers og eins.

Bjössi kemur með grænu Brooks jakkana í nokkrum númerum á æfingu í dag (sjá tölvupóst). Á aðalfundi Laugaskokks um daginn var kosið um jakka fyrir hópinn og nú er komið að því að máta og panta ef hópnum líst vel á. Planið er að láta merkja jakkana með laugaskokks logoinu. Held að það verði flottast að setja það á bakið og hafa það í þokkalegri stærð, annaðhvort svart eða endurskin. Endilega komið með hugmyndir að útfærslu.

Hvað: Máta jakka

Hvar: Laugum

Hvenær: Í dag kl. 17-17:30 og á mánudaginn

Jóhann Ingi Gunnarsson, sálfræðingur, flutti síðasta fræðsluerindið á þessu misseri sl. mánudagskvöld. Fyrirlesturinn nefndist "Þú getur þetta - hver sagði að þetta væri auðvelt?" og fjallaði einkum um huglægan undirbúning fyrir keppni, þ.e.a.s. um markmiðasetningu, viljastyrk, undirbúning og framkvæmd. Efnið höfðaði greinilega til margra því salurinn var fullsetinn og voru gestir um 110 talsins.

Markmiðasetning er mikilvæg í afreksþjálfun og mælti Jóhann Ingi með því að menn settu sér háleit markmið fremur en að sætta sig við minna. Háleit markmið geta vel verið raunhæf, en því aðeins að hugur fylgi máli, viljinn sé til staðar, áætlunin sé til staðar og framkvæmd keppninnar takist vel

Góður rómur var gerður að erindi Jóhanns Inga og vonandi verður það sem flestum hlaupurum innblástur í keppni komandi mánaða, enda hávertíð hlaupara að fara í hönd.

Alls voru sex fyrirlestrar fluttir í fræðslufundaröð Laugaskokks og World Class þennan veturinn og er ætlunin að taka að nýju upp þráðinn næsta haust. Hafi menn ábendingar um áhugaverð umfjöllunarefni eða áhugaverða fyrirlesara má gjarnan koma þeim á framfæri í athugasemdakerfinu.

Þú getur þetta – hver sagði að þetta væri auðvelt?  Jóhann Ingi Gunnarsson flytur.

Fyrirlestur haldinn mánudaginn 23. apríl 2012 kl. 20:00 í veitingasal Lauga.

Fræðslufundaröð Laugaskokks og World Class er fram haldið veturinn 2011 – 2012. Sérfræðingar á sínu sviði fjalla um helstu málefni er snúa að æfingum og keppnisþjálfun. Sjötti fræðslufundurinn á þessum vetri er helgaður huglægum þáttum keppnisundirbúnings.

Fyrirlesari er Jóhann Ingi Gunnarsson, sálfræðingur og fyrrverandi landsliðsþjálfari. Jóhann Ingi lauk embættisprófi í Kiel í Þýskalandi þar sem hann lagði jafnframt stund á hanknattleiksþjálfun. Hann hefur víða komið við í heimi íþróttanna, var meðal annars sálfræðingur íslenska Ólympíulandsliðsins í Bejing 2008. Jóhann Ingi hefur undanfarin ár verið eftirsóttur fyrirlesari og ráðgjafi á sviði stjórnunar og samskipta á vinnustað.

Fyrirlestur Jóhanns Inga nefnist "Þú getur þetta – Hver sagði að þetta væri auðvelt?". Í fyrirlestrinum verður farið yfir hvernig við setjum okkur skýr og háleit markmið og náum þeim. Einnig verður farið yfir hvernig við náum fram réttu hugarfari og byggjum upp sjálfstraust til að takast á við krefjandi verkefni. Fyrirlesturinn miðast við þá sem bæta vilja árangur sinn í keppni, hvort sem um er að ræða hlaup, þríþraut, cross-fit eða aðrar greinar. Auðvelt er að yfirfæra boðskap fyrirlestrarins yfir á hvað sem við viljum takast á hendur til að ná betri árangri í.

Aðgangur er ókeypis